Aasiaat

Aasianni Pineqaatissinneqarsimasunut inissiisarfik


KiF
Isumaginninnermut siunnersortimik oqaloqateqarneq:


Inissiisarfimmiittussatut pineqaatissinneqarpunga
Eqqartuussinermi inissiisarfimmiittussatut pineqaatissinneqaruit marlunnik periarfissaqarpoq:
 

Eqqartuussiviup aalajangersinnaavaa erngerlutit inissiisarfimmi tigummineqassasutit pineqaatissiissutip naammassinissaanut. Tigummineqartumiit inissiisarfimmiittussanngortitaanissamut ikaarsaartussaaguit inatsisitigut allatigullu kingunissai pillugit inissiisarfimmi sulisut ilitsersuutissavaatsit, ilaatigut avataaniit pulaarteqarnissaq, oqarasuaateqarneq, anisinnaaneq immaqalu inissiisarfiup avataani sulisinnaanermi periarfissat pillugit. 

Aamma eqqartuussiviup aalajangersinnaavaa pineqaatissiissut erngerluni naammassineqassanngitsoq, illillu angerlarsinnaavutit Pinerluttunik Isumaginnittunit aggersarneqarnissat utaqqillugu. Pinerluttunik Isumaginnittut Qullersaqarfiata eqqartuussut tiguppagu pineqaatissiissutip naammassinissaanut aggersarneqassaatit Pinerluttunik Isumaginnittut inissiisarfiisa ilaanni inissaqalerpat, taakkulu Ilulissani, Sisimiuni, Aasianni, Nuummi, Qaqortumi Tasiilamilu inissisimapput. Inissiisarfiit pillugit atuarsinnaagutit uani. 

Inissiisarfinnut linki

Aggersarneqarninniit takkunnissannut sivikinnerpaamik qaammammik ataatsimik periarfissinneqassaatit. 

Aallaavigineqassaaq najukkannut qaninnerpaami inissiisarfimmiinnissat sumili inissinneqarnissannik toqqaanermi allat aamma tunngavilersuutigineqartarput, ilaatigut eqqartuussutip atuutsinneqarnissaa Pinerluttunillu Isumaginnittut ingerlatsiviisa atorluarnissaat. 

Sumi inissinneqarnissat pillugu Pinerluttunik Isumaginnittut aalajangiinerat maalaarutiginiarukku tamanna Pinerluttunik Isumaginnittut Qullersaqarfianut maalaarutigisinnaavat uppernarsaatitalerlugu. 

Pineqaatissinneqarnerpit naammassinissaa kinguartikkusukkukku politiit attaveqarfigissavatit, taakku qinnuteqaatit suliarissammassuk. Pineqaatissiissutit kinguartinneqassappat pissutsit immikkut ittut kinguatsitsinerup pitsaanerunissaanik takutitsisut tunngaviussapput. Immikkut pisoqarnera uppernarsarsinnaassavat. Pissutsit immikkut ittut tassaasinnaapput suliffiup ilinniarnerulluuunniit paarinissaa, peqqinnissamut ilaqutariinnermulluunniit tunngasut, kinguartitsinissamut tunngaviusinnaasut. Kinguartitsinissaq ajornarnerusarpoq inoqammut navianartumik pinerluuteqarsimatilluni. Kinguartitsinerup ingerlanerani nutaamik pinerluuteqartoqaqqusaanngilaq piumasaqaatillu kinguartitsinissamut tunngaviusut malinneqassallutik. Kalaallit Nunaanni Politiinut linki 

Pinerluttunik Isumaginnittut Qullersaqarfianut saaffiginnillutit annertunerusumik paasiniaasinnaavutit.

Inuiaqatigiinni sullissisussatut pineqaatissinneqarpunga
Eqqartuussut Pinerluttunik Isumaginnittunut annguppat oqaloqatigineqarnissamut aggersarneqassaatit ataatsimoorlusilu paasiniassavarsi sumi inuiaqatigiinni sullississanersutit. 

 

Eqqartuussummi allassimassaaq akunnerit qassit inuiaqatigiinni sullississanersutit sullissiffissallu peqatigalugu pilersaarusiussaasi akunnerit qanoq ingerlanneqassanersut. Pisariaqarpat suliffiit ilinniarnerilluunniit isiginiarneqassapput. 

Sumi najugaqarnerit apeqqutaatillugu inuiaqatigiinni kiffartuussinissaq assigiinngitsunik periarfissaqarpoq illillu kissaatitit piginnaasatillu sapinngisamik aamma isiginiarneqassapput. Inuiaqatigiinni sullissivissat ilaat makkuussinnaapput: 

  • Kommunimi eqqakkanik immikkoortiterinermi 
  • Højskolimi 
  • Timersortarfimmi 
  • Qatserisartuni  

Pinerluttunik Isumaginnittut attavigalugit inuiaqatigiinni sullissineq pillugu paasiniaasinnaavutit 

Nakkutigineqartussatut eqqartuunneqarpunga
Nakkutigineqartussatut eqqartuunneqaruit piffissaq siulleq atorlugu Pinerluttunik Isumaginnittut oqaloqatigiinnissamut aggersassavaatsit.
 

Nakkutigineqartussatut eqqartuunneqarneq tassaavoq akunnattumik akuttussusilimmik nakkutilliisumik oqaloqatigiittarnissat nakkutigineqarnissamullu piumasaqaatit malittussaavatit.

Pinerluttunik Isumaginnittut attavigalugit nakkutigineqarneq pillugu paasiniaasinnaavutit.