Qanigisaavunga

Inissiisarfimmiittussatut, inuiaqatigiinni sullissisussatut assigisaannilluunniit pineqaatissinneqarsimasumut qanigisaasutut misinnarajuttarpoq pineqaatissiinerup ilaqutariit tamaasa sunnertarai, meeraappata, angajoqqaajuppata, aappaappata allaappataluunniit.

Inuk pineqaatissinneqarsimasoq pillugu ilaannikkut Pinerluttunik Isumaginnittunik oqaloqateqarnissaq pisariaqartinneqartarpoq.

Pinerluttunilli Isumaginnittuni sulisut nipangersimasussaatitaapput sullitamik inuttaanut tunngasut pillugit inunnik allanik oqaloqateqaqqusaanatik – allaammi sulisunit oqaatigeqqusaanngilaq pineqartoq Pinerluttunik Isumaginnittunit sullinneqarnersoq. Taamaattumik naatsorsuutigisinnaanngilat Pinerluttunik Isumaginnittuni sulisunit qanigisatit pillugit paasitinneqarnissat.

Qanigisat sumiinnersoq nalornigukku Pinerluttunik Isumaginnittut Qullersaqarfianut allassinnaavutit. Inuk pineqartoq inissiisarfitta ilaannut inissinneqarsimappat allakkatit ingerlateqqissinnaavagut, allakkatilli tunniunneqarsimanersut akissutisinavianngilatit.

Inissiisarfimmiittoq pulaarniarukku inissiisarfik saaffigissavat akuerineqarnissat qinnutigalugu. Pulaarnissat itigartinneqarsinnaavoq tamanna isumanngitsutut nalilerneqarpat assersuutigalugu illit siusinnerusukkut sakkortuumik pinerluuteqarsimanerit peqqutigalugu.

Qanigisatit aamma allaffigisinnaavatit poortukkanilluunniit pajullugit, naluginiassavalli allakkat poortukkallu sulisut najuunneranni ammarneqarsinnaammata, soqarsinnaavormi inissiisarfimmut nassiunneqaqqusaanngitsunik pulaarnermiluunniit nassarneqarsinnaanngitsunik. Misissorneqarsinnaanngitsunik imaluunniit inissiisarfimmut nassaqqutaanngitsunik pulaarninni nassaqqusaanngilatit. Tassaasinnaapput oqarasuaatit angallattakkat, sakkut, nakorsaatit, qarasaasiat assigisaalluunniit. Inissiisarfimmiittoq aningaasanik tuniniarukku aningaasat inissiisarfimmi sulisunut tunniutissavatit (soorunamik uppernarsaammik tunineqassaatit).

Pulaarnissamut piffissat, atisanik, aningaasanik allanillu tunniussisinnaaneq pillugu paasisaqarusukkuit inissiisarfinni ataasiakkaani paasiniaasinnaavutit:

Aasiannit pineqaatissinneqarsimasunut inissiisarfik

Ilulissani pineqaatissinneqarsimasunut inissiisarfik

Nuummi pineqaatissinneqarsimasunut inissiisarfik

Qaqortumi pineqaatissinneqarsimasunut inissiisarfik

Sisimiuni pineqaatissinneqarsimasunut inissiisarfik

Tasiilami pineqaatissinneqarsimasunut inissiisarfik