Inissiisarfimmi paarsisumut ilinniarneq ukiunik marlunnik sivisussuseqarpoq misiligummillu atorfilittut atorfinitsinneqassaatit. Ilinniarneq naammaginartumik naammassisimagukku ukiut marluk sulereerlutit atorfinitsivinneqassaatit.
Inissiisarfinni arfinilinni Ilulissani, Aasianni, Sisimiuni, Nuummi, Qaqortumi Tasiilamilluunniit atorfinissaatit inissiisarfinnilu paarsisunit misilittagaqarluartunit ulluinnarni suliassanik ilinniartinneqassallugit.
Atorfininninnut atatillugu sulinermik sungiusaasumut attavilerneqassaatit taassumalu ilinniarnerit tamaat ikiussavaatit. Inissiisarfimmi paarsisutut ilinniarninni marloriarlutit Nuummiissaatit sapaatit akunnerini 7-8-ni. Ukioq ataaseq allortarlugu atuagarsornermik ilinniartitsineq ingerlanneqartarpoq.
Ilinniarnerup ingerlanerani aamma inissiisarfimmi allami atorfieqarfinnit allaanerusumi qaammammi ataatsimi sungiusassaatit.
Alloriaqatigiitta – sammen går vi frem
Kalaallit Nunaanni Pinerluttunik Isumaginnittut pingaarnertut marlunnik suliassaqarput. Eqqartuussutit inaartarpagut inissiisarfimmiittussat sullitallu inuunermut isumannaatsumut pinerlunnertaqanngitsumut ikiorniarsaralugit kaammattorlugillu. Suliassap naammassinissaanut ikioqatigiittarpugut, suliassallu suliarinissaannut kikkut tamarmik pingaaruteqarput.
Ukiuni marlunni inissiisarfimmi nakkutilliisunngorniarit
Imaappoq:
- 21-nik ukioqalersimassaatit
- Minnerpaamik meeqqat atuarfiat misilitsinnertalimmik naammassisimassavat
Naatsorsuutigaarput:
- Marluinnik oqaaseqartuussutit imaluunniit qallunaatoornermik/kalaallisoornermillu ilinniaqqinnissannut sapiissuseqarlutit
- Inuit ineriartornerannik soqutigisaqartutit
- Tarnikkut nukittuujusutit
- Aaqqiagiinngittoqartillugu eqqissisimallutillu aalajaatsuusutit
- Suleqatigiillaqqissuussutit
Inissiisarfimmi nakkutilliisutut ilinniarnissannik qinnuteqaruit pinerluuteqarsimasut allattorsimaffianniinnersutit misissorneqassaaq.
Pinerluttunik Isumaginnittut inuit sakkortuumik pinerluuteqarsimasut akuerineq ajorpaat. Qinnuteqaatinut tamanut atatillugu taamaattoq tigussaasumik nalilersuisoqartarpoq pisimasut misissorneqarlutik.
Suliap imarisai:
Inissiisarfimmi nakkutilliisutut imaattunik suliaqartoqartarpoq
- Nakkutilliineq nakkutiginninnermilu suliassat
- Inissiisarfimmiittunik oqaloqateqarneq
- Allattariarsorluni sullissineq
- Inissiisarfimmiittut peqatigalugit suliassaqartitsineq sunngiffimmilu sammisaqartitsineq
Sulinissamut piffissat nikerartuupput ilaatigut ullukkut, unnukkut unnuakkullu sulisoqartarluni. Inissiisarfiit ilaanni ulloq unnuarlu sulisoqartarpoq.
Ilinniarneq
Ilinniarnermi atuagarsorneq sulinermillu sungiusarneq paarlakaajaattarput. Ilinniarnerup ingerlanerani atuagarsorluni ilinniarnerit marluusarput sapaatit akunnerini arfineq marlunnik arfinerlu pingasunik sivisussuseqartunik. Atuagarsorluni ilinniarnermi ilaatigut makku ilinniartitsissutigineqartarput:
- Isumannaallisaanermut tunngasut
Aaqqiagiinngittoqartillugu iliuuserisinnaasat, pissaanermut isumannaallisaanermullu maleruagassat, allakkatigut uppernarsaanerit, ikiueqqaarnerit il.il.
- Pinerluttunik Isumaginninnerup iluani
Inissiisarfimmi ulluinnarni suliassat isumaginerat, oqartussaasutut iliuuseqarnerit, inissiisarfimmiittunik tigussaasumik sullissineq, Pinerluttunik Isumaginnittut suliffeqarfittut, pisinnaatitaaffiit pisussaaffiillu.
- Inuiaqatigiinnut tunngasut
Pinerluttunik Isumaginnittut inuiaqatigiinni inissisimanerat oqartussaasunillu allanik suleqateqarneq, atornerluineq katsorsaanissamullu periarfissat, pinerlunnermut peqqutaasut.
Sulinermik sungiusarneq sumiiffinni pingasuni ingerlanneqartarpoq. Ilinniarnerpit nalaani inissiisarfimmut attuumassuteqassaatit tassani sungiusaammik sulininni siunnersorteqarlutit, taassumalu inissiisarfimmi pisortaq peqatigalugu inissiisarfimmi nakkutilliisutut sulinermi suliassanik tamanik ilikkarnissat isumagissavaat. Tamatuma saniatigut inissiisarfimmi allami/illoqarfimmi allami sungiusaammik sulissaatit kiisalu Pinerluttunik Isumaginnittuni Ammasumiittuni sungiusaammik sulissallutit, ilaatigut nakkutilliinermik inuiaqatigiinnilu sullissinermik suliaqarlutit. Taamaattumik piffissap ilaani ilinniarninni angalasarnissat ilaquttavillu qimassimasarnissaat piareersimaffigissavat.
Piumasaqaatit
Illoqarfimmi allami angerlarsimaffiginngisanni atorfinikkuit angalanissamut akiliunneqassaatit. Atorfininnermut atatillugu inissaqartitsinissamut periarfissaqarpoq.
Misiligummik atorfilittut atorfinitsinneqassaatit. Ilinniarnerit naammassigukku atorfilittut atorfinitsinneqassaatit soraarnerussutisiaqarnissamut pisinnaatitaaffeqarlutit. Ilinniarnerup nalaani qaammammut tunngaviusumik kr. 21.833,50 koruunink akissarsiaqassaatit. Tamatuma saniatigut suliffiit nikerarnerannut tapeqassaaq. Atorfininnermi inuussutissarsiornikkut ilinniagaqarsimaguit immikkut ittumik tapeqartinneqassaatit.
Qinnuteqarniaruit
Qinnuteqarnermut immersugassaq immikkut ittoq immersussavat. Immersugassaq tassani aariarlugu krfo@krfo.gl -imut nassiullugu.
Qinnuteqaatit akuerineqartussatut nalilerneqarpat misilitsinnermut oqaloqatigineqarnissamullu aggersarneqassaatit. Misilitsinnermi qisuariariaatsitit nukittussutsillu nalilerneqassapput oqaloqatigineqassaatillu sooq inissiisarfimmi nakkutilliisunngorniarnissaq kajumiginerit. Misilitsinnginnermi sukumiinerusumik ilitsersorneqassaatit.
Qinnuteqarnissamut immersugassaq uani aaneqarsinnaavoq: Ansøgningsskema
Word-itut: Kriminalforsorgenansogningword97