Inissiisarfimmiittussatut eqqartuunneqarpunga
Inissiisarfimmi inissinneqartussatut eqqartuunneqaruit marlunnik periarfissaqarputit:
Erngerluni naammassineqartussaq
Eqqartuussutip erngerluni naammassineqarnissaa eqqartuussiviup aalajangersinnaavaa. Siusinnerusukkut tigummigallarneqarsimaguit inissiisarfimmut utertinneqassaatit. Tigummineqarsimaguit tigummisaajunnaarlutit inissinneqartutulli inissisimalernerit pillugu sulisunit ilitsersorneqassaatit. Inissinneqarnermi avammut attaveqarnissamut allanik periarfissaqarpoq, soorlu pulaarsinnaaneq, oqarasuaateqarsinnaaneq, anisinnaanermut periarfissat inissiisarfiullu avataani sulisinnaaneq.
Kingusinnerusukkut aggersarneqarnissaq
Eqqartuussiviup aamma aalajangersinnaavaa eqqartuussut erngerluni ingerlanneqassanngitsoq. Taamaassimappat angerlarsinnaavutit. Kingusinnerusukkut inissaqalerpat pineqaatissiissutip naammassinissaanut aggersarneqassaatit. Minnerpaamik sapaatit akunneri tallimat sioqqullugit aggersarneqassaatit. Pinerluttunik Isumaginnittut Ilulissani, Aasianni, Sisimiuni, Nuummi, Qaqortumi Tasiilamilu inissiisarfeqarput.
Inissiisarfimmi najukkannut qaninnerpaami inissinneqarnissat aallaaviuvoq allatigulli nalilersuisoqarneratigut allami inissinneqarsinnaavutit. Inatsisit atuutsinneqarnissaannut pissutsit peqqutaatillugit, soorlu pinerliivigineqarsimasup isiginiarneqarnissaa peqqutaasinnaavoq, imaluunniit Pinerluttunik Isumaginnittut inissiisarfiini inissat atorluarneqarnissaat pineqarluni.
Sumi inissinneqarnerit pillugu maalaarusukkuit maalaarut Pinerluttunik Isumaginnittut Qullersaqarfianut nassiussinnaavat pisariaqarpat uppernarsaatitalerlugu.
Pineqaatissiissutip naammassinissaata kinguartinneqarnissaanut qinnuteqaat
Aamma pineqaatissinneqarnerpit naammassinissaata kinguartinneqarnissaanik qinnuteqarsinnaavutit. Tamanna aggersarneqarnerup kingorna sapinngisamik piaarnerpaamik pisariaqarpoq. Qinnuteqaatit politiinit suliarineqassaaq. Pineqaatissinneqarnerpit naammassinissaa kinguartinneqassapput immikkut inissisimasoqarnissaa pisariaqarpoq. Suliffik, ilinniarneq, peqqissuseq imaluunniit ilaqutariinnermi pissutsit immikkut inissisimanermut peqqutaasinnaapput. Kinguartitsisariaqarnissaq uppernarsartariaqarpat. Inoqammut navianaatilimmik pinerlussimaguit kinguartitsinissaq ajornakusoornerusinnaavoq. Kinguartitsinerup nalaani nutaamik pinerluuteqarsinnaanngilatit piumasaqaatillu kinguartitsinermi tunngavilersuutigineqartut malittariaqarpatit.
Inuiaqatigiinni sullissinissamik eqqartuunneqarpunga
Eqqartuussivimmi inuiaqatigiinnik sullissinissamik pineqaatissinneqarsimaguit eqqartuussut Pinerluttunik Isumaginnittunut nassiunneqassaaq. Pinerluttunik Isumaginnittut Ammasumiittut oqaloqatigineqarnissamut aggersassavaatsit ataatsimullu paasiniassavarsi inuiaqatigiinnik sullissineq sumi ingerlatissanerit.
Eqqartuussummi allassimassaaq akunnerni qassini inuiaqatigiinni sullississanersutit. Inuiaqatigiinni sullissivissat peqatigalugu akunnerit qanoq naammassineqassanersut pilersaarusiorneqassaaq. Sapinngisamik suliffiit ilinniarnerilluunniit assigisaallu isiginiarneqassapput.
Sumi najugaqarnersutit apeqqutaatillugu inuiaqatigiinni sullissinissap ingerlannissaanut assigiinngitsunik periarfissaqassaaq. Sapinngisamik kissaatitit piginnaasatillu isiginiarneqassapput. Assersuutigalugu inuiaqatigiinni sullissiviusinnaapput:
- Kommunimi eqqakkanik immikkoortiterineq
- Højskoli
- Timersortarfik
- Qatserisarfik
Pinerluttunik Isumaginnittut attaviginerisigut inuiaqatigiinnik sullissineq annertunerusumik paasiniarsinnaavat.
Nakkutigineqarnissamik eqqartuunneqarpunga
Nakkutigineqarnissamik eqqartuunneqaruit eqqartuussutip allassimaffia Pinerluttunik Isumaginnittunut nassiunneqassaaq.
Sapinngisamik piaarnerpaamik Pinerluttunik Isumaginnittut aggersassavaatsit.
Nakkutigineqarnissamik eqqartuussaagaanni akuttunngitsumik nakkutilliisunik oqaloqatigineqartassaatit, nakkutilliisullu piumasaqaataat malittussaavatit.
Nakkutigineqarneq pillugu paasiniaanissamut Pinerluttunik Isumaginnittut attavigisinnaavatit.